Paalam na Maestrang Kuring!

Gunita ko’t, gunam-gunam…
(Isang malayang taludturan)

Gunita kong makita ka sa umaga’y sapat na;
Gunam-gunam kong maisip na ika’y laging kasama;
Tanong ko’t balikwas sa isang pakling turing nila;
Walang habas na pagsagot sa inuring palamara!
Gunita kong inasal mong hinabi sa isang tupa;
Gunam-gunam sa diliryong ika’y laging tumatawa;
Pulos dampi ng pighating talos ko rin na daratal;
Walang layong umiwas pa kahit yaong sawing giliw!
Gunita ko ang aral mong sa isip ko’y tumitighaw;
Gunam-gunam na talakay sa talinong iyong bigay;
Kapalarang matiwasay na ‘yong laging pakiusap;
Talos ko rin na sa akin bukas palad na ibibigay.
Gunita ko ang disiplina na sa anyo ng pamalo;
Gunam-gunam na pakiwari, dahil ako’y iyong bunso;
Mahalaga’t itinuring na di iba sa kadugo;
Pagka’t batid na sa panahon, aakayin sa matino.
Gunita ko ang pagiliw na lagi ng sinasambit;
Gunam-gunam na nahirati, tiklop-tuhod sa pagkapit;
Balatkayo’y di naisip pagka’t sadyang iniibig;
Buong buhay ay ibinigay para sa yo’y itinangi;
Mapalad ka o Pulilan, napadpad ang isang Kuring;
Na nagmahal at nabigay ng buhay na ginigiliw;
Pasakit n’yang lubhang tamis di ba’t ngayo’y inani mo?
Sagitan ng mga anak na kahit na saan dako;
Sa relihiyon o palingkuran, pamumuno o serbisyo;
Ilang anak ang tumulad sa paghubog ng talino;
Ilang anak na tumulak mamuhay sa ibang dako;
Inhenyero o kimiko, peryodista o siruhano;
Abogado man o sundalo, ang ngalan mo ay itinanyag;
Kapalarang sadyang sulit, sa turo n’yang walang bahid;
Pagka’t sadyang ang ngalan mo sa puso n’ya iniukit.
Ngayon siya’y pumanaw na’t bilang isang ala-ala;
Di ba’t sadyang tama lamang, na s’ya ngayon ay parangalan;
Kahit sa huling sandali ng buhay nyang itinangi;
Sa dibdib mo ay ihimlay ang pagal n’yang katawan;
Di man sapat ang nakayanang sa saliw ng isang awit;
Paalam na Maestra ko, mahimlay ka ng tahimik;
Mga turo’y di mawawaglit sa puso ko at sa isip;
Kasama ka sa dalangin ko, magulang kong itinuring;
Paalam na, paalam na, aking Maestrang Kuring!


Rene San Andres
Dammam, KSA
27 June 2007